Nov 08, 2021

දෙමටගොඩ චමින්දගේ නම ජාත්‍යන්තර කුඩුකාරයින්ගේ ලයිස්තුවේ!

මුදල් විශුද්ධිකරණ පනත ප්‍රකාරව වරදක් කළැයි රක්ෂිත බන්ධනාගාර ගත කර සිටින රුවන් චමිල නොහොත් දෙමටගොඩ රුවන් ජාත්‍යන්තර හෙරොයින් ආනයනය කරන පුද්ගලයන්ගේ නම් ලැයිස්තුවේද සිටින බවට අනාවරණය වන බව කොළඹ ප්‍රධාන මහෙස්ත්‍රාත් බුද්ධික සී. රාගල මහතා හමුවේ අනාවරණය විය.

සැකකරුගේ බැංකු ගිණුම් සහ බැංකුවල ඇති සේප්පු සම්බන්ධයෙන් මේ වනවිට විමර්ශනයක් ආරම්භ කර ඇති බවද සැකකරු මේ වනවිට බූස්ස බන්ධනාගාරයේ රඳවා සිටින බවද ඔහුගෙන් තවදුරටත් කරන ලද විමර්ශන සඳහා ප්‍රකාශ සටහන් කර ගැනීමට අවශ්‍ය බවද පැමිණිල්ල වෙනුවෙන් රජයේ ජේ‍යෂ්ඨ නීතිඥ හම්සා අබේරත්න මහතා අධිකරණයට දැනුම්දුන්නේය.

මෙම සැකකරුගේ බිරියගේ නමට බොරැල්ල ප්‍රදේශයේ ලියාපදිංචි කර ඇති ගිම්හාන රෙස්ටුරන්ට් නමැති ව්‍යාපාරයේ මුලදී මාසික ආදායම ලක්ෂ 05 ලෙස පෙන්නුම් කළද විමර්ශන ආරම්භ කළ පසු එහි ආදායම ලක්ෂ 50ක් ලෙස පෙන්නුම් කර ඇති බව අනාවරණය වන බව පැමිණිල්ල අධිකරණයට කරුණු දැක්වීය. 

ඒ අනුව කරුණු සලකා බැලූ මහෙස්ත්‍රාත්වරයා සැකකරු ලබන 19 වැනිදා තෙක් තවදුරටත් රක්ෂිත බන්ධනාගාරගත කරන ලෙස නියෝග කළේය. 

 

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top