Nov 18, 2021

විදේශ අමාත්‍යවරයා, බංග්ලාදේශ අග්‍රාමාත්‍යවරිය හමු වෙයි

ශ්‍රී ලංකාවේ විදේශ අමාත්‍ය මහාචාර්ය ජී.එල්. පීරිස් මහතා බංග්ලාදේශයේ ඩකා නුවර පිහිටි අග්‍රාමාත්‍ය කාර්යාලයේ දී බංග්ලාදේශ අග්‍රාමාත්‍ය ෂෙයික් හසීනා මැතිනිය හමු විය.

කොවිඩ්-19 වසංගතය පාලනය කිරීම සම්බන්ධයෙන් ශ්‍රී ලංකාව ලබා ඇති සාර්ථකත්වය මෙන්ම ශ්‍රී ලංකාව තුළ පවතින පුළුල් පරාසයක වර්තමාන ගැටළු පිළිබඳව අමාත්‍ය මහාචාර්ය පීරිස් මහතා  බංග්ලාදේශ අග්‍රාමාත්‍යවරියව දැනුවත් කළේ ය.

නිල මට්ටමේ සාකච්ඡා දැනටමත් ආරම්භ කර ඇති, වරණීය වෙළඳ ගිවිසුමක් කරා එළඹීම සම්බන්ධයෙන් වන ප්‍රගතිය සහ නාවික ක්ෂේත්‍රයේ සහයෝගිතාව කෙරෙහි විශේෂ අවධානයක් මෙහිදී යොමු විය.

පුළුල් ඩිජිටල්කරණ වැඩසටහනක් ආරම්භ කිරීමට සහ ගොවීන්ගේ උපයෝජ්‍ය ආදායම ඉහළ නැංවීමට තම රජය ගෙන ඇති මුලපිරීම් පිළිබඳව අග්‍රාමාත්‍යවරිය අමාත්‍ය මහාචාර්ය පීරිස් මැතිතුමා හමුවේ විස්තර කළාය. කොළඹ සහ ඩකා නුවර අතර ගුවන් සම්බන්ධතා වැඩි දියුණු කිරීම සහ සංචාරක ක්ෂේත්‍රය ඉහළ නැංවීම පිළිබඳව ද මෙහි දී සාකච්ඡා කෙරිණි.

අමාත්‍ය මණ්ඩලයේ 21 වැනි රැස්වීමේ දී ඉන්දියානු සාගර වටද්දර රටවල සංගමයේ (IORA)  උපසභාපතිත්වය  භාර ගැනීම සඳහා අමාත්‍ය මහාචාර්ය පීරිස් මහතා ඩකා නුවරට පැමිණියේ ය.

 

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top