May 22, 2022

ජොනීට හෙට CID යට එන්න කියයි!; සතානාලකත් අත්අඩංගුවේ

පාර්ලිමේන්තු මන්ත්‍රී ජොන්ස්ටන් ප්‍රනාන්දු මහතා මහතා ඇතුළු පාර්ලිමේන්තු මන්ත්‍රීවරුන් කිහිපදෙනෙකු හෙට (23) අපරාධ පරීක්ෂණ දෙපාර්තමේන්තුවට කැඳවීමට නියමිත බව වාර්තා වේ.

ඒ පසුගිය 09 වැනිදා ගාලු මුවදොර හා කොල්ලුපිටියේදී අරගලකරුවන්ට පහරදීමේ සිද්ධිය සම්බන්ධයෙන් ප්‍රකාශ ලබා ගැනීම සඳහාය.

මේ අතර, ගාලු මුවදොර දී අරගලකරුවෙකුගේ හිසට යකඩ මුගුරකින් පහරදීම සම්බන්ධයෙන් පාතාල කල්ලි සාමාජිකයෙකුගේ ඥාතියෙකු වන 'සතා නාලක' නම් පුද්ගලයා ද අපරාධ පරීක්ෂණ දෙපාර්තමේන්තුව අත්අඩංගුවට ගෙන තිබේ.

අදාළ සැකකරු හෝකන්දර ප්‍රදේශයේ සැඟවී සිටියදී අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන ඇත.

සැකකරු 43 හැවිරිදි අශාන්ත නාලක හෙවත් සතා නාලක නමින් හඳුන්වන අයෙකි.

ගාලු මුවදොර ඇතිවූ සිද්ධියේදී ඔහු ස්කූටරයකින් පොදුජන පෙරමුණේ ආධාරකරුවන් සමග ගාලු මුවදොරට පැමිණ තිබුණි.

එමෙන්ම ඔහු පාතාල කල්ලි සාමාජිකයෙකුගේ ඥාතියෙකු බවද අපරාධ පරීක්ෂණ දෙපර්තමේන්තුව මගින් අනාවරණ කරගෙන තිබේ.

මොහු මීට පෙර මිරිහානේ ජනාධිපතිවරයාගේ පෞද්ගලික නිවස අසල ඇතිවූ විරෝධතාවයේදී ගිනිගැනීමට ලක්වූ යුද හමුදා බස් රථය පදවාගෙන පැමිණ විරෝධතාකරුවන් ඉදිරිපිට නැවැත් වූ පුද්ගලයා බවටද පොලීසිය අනාවරණ කරගෙන තිබේ.

මේ අතර මෙම පුද්ගලයා පසුගිය පස්වනදා පාර්ලිමේන්තුව ඉදිරිපිට පැවති විරෝධතාවය අතරතුරදී ද අරගලකරුවන්ට විරුද්ධව අදහස් පලකළ අයෙකි.

 

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top